澳洲牛奶公司

唔得，作為一間我0既all time favourite餐廳，眼見咁多人都俾個bad reputation佢，我一定要為佢平反。


我去過大大話話都五六次，但係由我第一次去到宜家，我從來都無一刻覺得佢地服務差，態度差。


在我黎講，我覺得佢地可以話係「大聲唔代表無禮貌」個餐牌簡單到唔簡單，仲有咩要諗呢? 煎蛋/炒蛋? 多士? 通粉/意粉? 咁都要諗? 今日我去食，快賣單的時候有個男仔入到黎。人地同佢講野又完全無反應，答每一樣野之前都「errrrrrrr」一大餐。宜家叫佢揀老婆定女朋友呢?


又有人話成日趕人走，我從來都未試過lor。今日我去到同檯個對男女都就食完，我差唔多食完佢地先走，都無人趕佢地啦，我又唔見有人惡睥佢地啦。



隔離檯有人懷疑黎錯野，個待應都問佢「係未錯左? 係就換過俾你。」出面有邊間茶記會咁主動?


話人地態度差個0的，我覺得簡直同去大排檔要求酒店級服務水準無分別。係澳牛我同佢地講唔該，佢地都會同我講唔洗唔該。我又真係唔知邊方面差啦。


再夜少少我去買甜品外賣個陣，要一個牛奶蛋白，一個杏汁燩蛋。點知講左「一個燉奶，一個蛋白」個阿哥都即刻同我講「燉奶同蛋白係同一樣野，唔洗咁急，過黎睇(menu)清楚先」咁樣叫唔叫無禮貌呢?


anyway，我覺得接受唔到咁0既service，就唔該唔好再去，總好過去完之後跟住就周圍同人講佢地0既服務差云云，只係你自己唔識去接受jei。


＊＊＊＊＊＊＊＊


發現新大陸


食過咁多次澳牛，覺得有個遺憾就係常餐快餐都無得外賣，搞到我想俾阿爸阿媽試下個炒蛋都無機會。今晚食完個快餐，去聽完個seminar之後就再去買個鮮奶燉蛋白同埋杏汁燉蛋返屋企做宵夜。


唔知點解我係超愛燉奶呀，燉蛋呀，燉蛋白呀，布甸呀呢0的野。個鮮奶燉蛋白簡直無得講，我唔食得甜，但係佢呢個就岩岩好，唔太甜，而且亦都好滑，以後去澳牛又多樣野揀。


我本身唔鍾意杏汁陣味，但係佢呢個杏汁燉蛋係有陣杏汁味，不過淡淡地，又覺得幾香喎。


兩樣俾我揀呢，我都係鍾意燉蛋白多0的，嘿!
今晚呢兩個甜品我自己一個人食晒，正~