朋友

我從來都唔會否認我係一個孤獨精。做一個孤獨精，我唔覺有咩問題。話不投機半句多，我唔會因為我無乜朋友所以就特別去渴求。人同人之間講緣，講關心，講尊重，一段關係入面呢三樣野都無，仲算咩朋友?

我有一班為數八九個0既朋友，由中一已經認識。係一班人入面，我永遠都係被人忽略個位。出街佢地行前面，我自己一個人行後面。佢地成班人要我自己一個人係旺角街頭到等佢地成個鐘，為0既只係因為要等埋另一個人。(我仲要胃痛!) 仲有去BBQ，專登要我山長水遠走入去西貢，為0既只係為左幫佢地set 個camp light，到我自己一個人走左(夜晚一個女仔係西貢0既BBQ場走! 自己帶炭去set爐個隻!)佢地一個電話都無打過俾我，問我係邊。當晚我已經對呢班所謂0既朋友死左心，最基本0既關心同尊重都無，叫咩朋友?

基本上呢一班所謂0既朋友，我都幾肯定，如果唔係我搵佢地，基本上可能我死左兩三個月之後佢地先會因為有飯局，然後先會知我係生係死lor。

仲有一個女仔，早兩年做野認識的。佢屋企係北京人，而個女仔就係香港大。我同佢離開左間公司之後，大家都間中有MSN下。早幾個禮拜佢同我講佢將會係今年內結婚，會係香港註冊，北京擺酒, 我仲超興奮地話要去北京飲佢個餐。佢叫我幫佢搵下有無屋可以租半年，因為佢想俾佢老公體驗一下香港0既生活喎。我幫佢問埋我親戚租唔租俾佢，只係等人地覆。好啦，2月尾我係msn見佢寫住3月頭會返香港一個禮拜，諗住佢係黎搵屋，就無理佢。今朝再問下佢搵屋搵成點:
佢「可能暫時不回來香港了」
我「你唔係話黎香港註冊咩?」
佢「搞定了」
我「註冊左?」
佢「是呀」

嘩~ 真係多謝晒，唔係我問下，又真係唔知道原來佢已經註左冊lor。朋友喎，同我講聲都好啦，起碼都得個知字嗎。

我真係唔知點解成日都識到呢0的「朋友」。仲要我本身已經無咩朋友喎!
桃花弱到咩咁lor~~

所以我係好羨慕一0的可以搵到真心朋友0既人，如果你地搵到，記住好好珍惜。