我的拾陸樹

唔記得幾耐之前，俾伊甸園園主tag左我。已經爭左好多相懶得post，咁我諗我都不能夠懶到咁連字都唔打，所以就等我慢慢打啦。(我好鬼多野講的，慢慢睇，一路嘆Star*b，一路食件Greentea Tofu Cheese Cake就岩。)

(頭先諗到想打0既，已經唔記得左想打咩... -_-)

等我諗到先再繼續....

(tea break上黎又諗到0的..)

1. 我係一個不折不扣0既食肉獸。我可以成個禮拜唔食菜，但係唔可以一兩日唔食肉。我唔係唔鍾意食菜，如果0的菜煮得好食，我會食。但係好多時0的菜都煮到爛稀巴，我見都唔想見。同埋我唔食街外菜，一來我覺得洗唔乾淨，你諗下你係屋企自己洗菜會洗得有幾乾淨? 人地一日要煮咁多菜，唔好講話搵水浸，有用水同你沖過都偷笑。出面0的炒菜好鬼油，就算烚，0的水好多時都有落到油，要記住0的菜係好吸油的，食菜都係為左健康0的，吸晒油0既菜同一塊索左油0既麵包無分別，會點健康法呢? 另外我對菜的確係比較挑剔的，鬼叫肉都係得牛肉，雞肉，豬肉，羊肉呢幾個大類，但係菜又有分咁多種咩。我唔會食西芹，椰菜，娃娃菜，高麗菜(以上呢四種，我一食會想嘔)，芥菜，苦瓜(其他瓜類可以考慮，不過我食南瓜)，小棠菜(er，我唔知可以點塞佢入口) 呢0的係最基本唔食0既菜。我會食0既菜有西生菜(唔係唐生菜! 苦的!)，白菜仔，菇(都算係菜掛..)，紅蘿蔔，薯仔，芋頭。(啦.. 我有好多菜會食嫁~~~)

2. 屋企人唔食牛，我同佢地食飯唔會叫牛0既野。因為一叫牛，我阿爸就會話「宜家又唔係無野食，點解一定要食牛jei? 你知唔知瘋牛症潛伏期有幾耐呀?」okay，我知，亦都知點解會咁嚴重，所以好在我並不是特別鍾意食牛。我真係會想食牛0既時候係打邊爐同牛角，或者一0的唔太厚0既steak 我都會食。但係如果成件扒中間係紅晒，有血流出黎個隻，唔洗啦，多謝。因為我覺得自己好似咬住一舊未煮過0既生肉，跟住會諗食左好多細菌落肚，然後就想嘔。所以我食0既牛扒羊扒一定要七八成熟。

基本上屋企係以食豬肉，魚肉為主，因為阿爸唔鍾意食雞肉。點解唔鍾意呢，又唔係好知。屋企0的豬肉來來去去都係炒肉片，煮鹹肉(送粥食的)。而魚通常都係買魚柳黎煎，或者一隻隻咁煮豉油水(又係for 送粥的)。基本上我屋企煮0既野，我背都背得出。屋企食0既野就係咁單調嫁啦，睇下你食定唔食lor，再唔係，自己煮lor(諗下好啦~)。

係香港只會食熟的三文魚，個種油香，正到暈~ 有人話熟0既三文魚好腥，我只想講，你唔識煮lor。盡可能都會避免食生野，香港人對衛生呢兩個字意識好低，係香港亦唔會食生的三文魚，因為我唔想食到成肚蟲(好多都係東南亞或者中國0既養殖三文魚)。同埋我對生蝦敏感，生蝦曾經係我0既至愛之一。

3. 其實我好鍾意煮，每一次去其他blog到睇人地煮0既野，整0既dessert，我都會好手痕好想整! 但係無奈屋企細，每次開個oven都會搞到成間屋好熱，所以媽咪已經勒令唔準開。另外呢，係屋企煮，唔可以想煮咩就煮咩(起碼雞翼同牛都唔得先)，所以我都好少係屋企煮。

4. 由細到大都好鍾意車，對車都有少少認識，咁當然啦，我唔會連巴士貨櫃車都識。以前細個成日諗，一到18歲就要去學揸車，但係到左16歲先知，原來考車牌係好貴的! 同埋車牌又唔係必需的，就拖到宜家都未去考。不過每次去完外國，見到人地揸車，都會勁手痕，勁想揸，然後返到香港又會睇下學車幾錢，想快0的考返個牌，起碼去到外國人地有車，我都有得揸下嗎。如果有錢俾我買車，唔限價錢，我會揀Alphard同埋Smart lor。Alphard梗係用黎車阿爸阿媽，Smart就返工用黎揸的，我返工咁近，無理由唔揸車掛，唔錯唔錯。(今晚開六合彩，發下夢都得掛~)

5. 勁鍾意影相，但係勁唔鍾意執相。所謂0既執係包括re-size在內。我真係覺得resize相好鬼麻煩lor。

講返影相，如果唔計相機0既重量，我會每日帶部DSLR，DC，Fuji 即影即有同埋LCA出去(最少!)。不過相機係一樣好重0既野，因為重量問題，我已經好耐無帶過部DSLR出街好好咁影相 (我用50/1.8都覺重!)。DC就每日都一定會帶係身的。LCA就.. 曬相太貴啦... 曬相都曬窮人.. 嗚~~~~

基本上我係咩都影一餐，不過影左咁耐，都係覺得自己影相一0的進步都無。唉~

打住咁多先~